ni Floyd Castro, United Methodist Church
Awit 33:4-6, 9, 18, 20,22
Deut. 4:32-34, 39-40
Rom. 8:14-17
Mateo 28:16-20
Mateo 28:16-20 Samantala, ang labing-isang alagad ay pumunta sa Galilea, sa bundok na ipinagbilin sa kanila ni Jesus. At nang siya’y kanilang makita, sila’y sumamba sa kanya. Ngunit ang iba ay nag-alinlangan. Paglapit ni Jesus ay sinabi niya sa kanila, “Naibigay na sa akin ang lahat ng awtoridad sa langit at sa ibabaw ng lupa. Kaya’t sa inyong paghayo ay gawin ninyong alagad ang lahat ng mga bansa, na binabautismuhan sila sa pangalan ng Ama at ng Anak at ng Banal na Espiritu, at tinuturuan silang gumanap sa lahat ng mga bagay na ipinagbilin ko sa inyo. At tandaan ninyo, ako’y kasama ninyong palagi, hanggang sa katapusan ng panahon.” (FSV)
Hindi na bago ang pagtawag ng Diyos sa kanyang mga mananampalataya at tagasunod upang isulong ang kanyang katuwiran sa iba’t ibang lugar. Mula pa sa mga kwentong nakasulat sa Lumang Tipan, humirang ang Diyos ng mga lalaki at babae upang magpahayag ng pag-asa at ipagtanggol ang kanyang bayan. Mayroon din namang tulad ni Abraham na tinawag mula sa kanyang kinagisnang lupain hindi upang magpahayag kundi upang mamuhay ayon sa kalooban na Diyos.
Walang gaanong pinagkaiba ang mga hamon sa pagtanggap sa tawag ng Diyos sa ating panahon. Habang binabasa natin ang atas ni Hesus sa unang mga alagad, naririnig din natin ang ating calling upang gawing “alagad ang lahat ng mga bansa” at turuan silang “gumanap sa lahat ng mga bagay na ipinagbilin” niya.
Madalas hindi natin ito madaling tinatanggap dahil na rin siguro sa laki ng responsibilidad o sa liit ng tiwala sa sariling kakayahan na para bang ang mga ito ang magtatakda ng tagumpay o kabiguan. Hindi rin maikakaila na mahirap lisanin ang tinatawag nating comfort zone lalo na kung walang kasiguruhan ang lugar na tutunguhin. Ngunit sa kabila ng mga pag-aalinlangan at panganib, may mga taong tumutugon.
Hindi nakapagtataka na sa ating pagsunod ay may mga taong maaapektuhan, masasaktan at lalaban. Kung paanong tinapatan nila ang katuwiran ni Hesus ng mga paratang, kasinungalingan at karahasan asahan natin na marami ang i-re-reject ang dala nating mabuting balita ng kaligtasan at paglaya lalo na kung nakikinabang sila sa kasalukuyang kalagayan.
Pangunahin sa mga balita ngayon ang deportation order kay Sr. Patria Fox na isang 71-anyos na misyunero mula Australia na naglilingkod sa Pilipinas ng halos tatlong dekada. Bintang ng pamahalaan kay Sr. Pat na siya raw ay lumalahok sa mga gawaing pampulitikal na hindi dapat ginagawa ng mga dayuhan sa Pilipinas. Sabi mismo ng Pangulong Duterte na tinapakan daw ni Sr. Pat ang soberenya ng Pilipinas. Tagapagtanggol si Sr. Pat ng mga magsasaka at mahihirap. Ito ang pagsasapamuhay niya ng kanyang calling bilang isang Kristiyano. Minasama ito ng mga nasa kapangyarihan.
Hindi rin natin makakalimutan si Father Fausto “Pops” Tentorio na isang Italyanong pari mula sa Pontificio Instituto Missioni Estere (PIME) na naglingkod sa Pilipinas bilang misyunero mula 1978 hanggang noong siya ay pinaslang sa North Cotabato taong 2011. Naglingkod si Fr Pops sa mga katutubo ng Mindanao upang ipagtanggol ang kanilang karapatan sa lupa, buhay at kabuhayan. Tumulong siya upang ma-educate ang maraming katutubong kabataan sa Mindanao habang nilalabanan ang minahan at pangangamkam ng lupa ng mga dayuhan. Sinuklian ng karahasan ng mga nasa kapangyarihan ang kanyang paglilingkod.
Masarap maging tagahanga ni Hesus, ngunit hindi madali ang maging tagasunod niya. Kaya lagi nating panghawakan ang kanyang pangako na sasamahan niya tayo “hanggang sa katapusan ng panahon”. Amen.##